Gertakizuna

Ez dakit zehazki zein unetan

gertatu zen gertatu zitzaidana,

baina sentitu beharra daukat

zure amodioaren zirrara.

Ez dakit zure ezpainen gorria

edo zure begien dirdira,

zure ahotsaren goxoa

edo zure hitzen alaia,

zure esku finen fereka

edo zure adatsen usaia,

ez dakit haietako bakar bat

edo haiek guztiak batera,

ez dakit zenbat arrazoi ziren

zurekin maiteminarazi zidatenak.

Baina gertatu beharrekoa

finean gertatu zen,

eta zure sokari lotuta

biziko naiz nahitaez.

Zure nahiak asetzen,

zure beldurrak uxatzen,

zure gogoak aditzen,

zure grinak askatzen.

Zure beroa sentitzen,

zure gorputzaz gozatzen,

zure desioak betetzen,

zure musuak edaten.

Zure kezkak entzuten,

zure aholkuak jarraitzen,

zure aurpegia begiratzen

zure irudia marrazten.

Ez dakit zehazki zein unetan

gertatu zen gertatu zitzaidana,

baina zure arma guztiak hartuta

(zure xarma guztiak hartuta),

ondotxo dakit nik

preso hartu ninduzula.