Itakarako zure bidea hasten
duzunean
erregutu luzea izan dadin,
menturez eta esperientziez betea.
Ez beldurrik izan lestrigoiei,
ez ziklopeei,
ezta Poseidon suminkorrari ere,
horrelako izakirik ez baituzu inoiz
bidean ikusiko
zure gogoa goian badago,
zure arima eta gorputza ukitzen
dituen zirrara
aparta baldin bada.
Lestrigoiak, ziklopeak eta
Poseidon bihozgabea
ez dituzu bidean aurkituko
zure baitan gordeta ez badituzu,
zure arimak altxatzen ez
badizkizu.
Erregutu bidea luzea izan
dadin,
udako goiz askoan
inoiz ikusi gabeko portuetara,
plazer eta poza handiaz, heldu
zaitezen.
Geratu Feniziako merkatuetan
eta hango merkantzia ederrak
hartu,
nakar eta korala, anbare eta
ebanoa,
eta mota askotariko lurrin
sentsual,
ahalik eta lurrin sentsual
gehienak.
Zoaz egiptiar hirietara eta
ikasi
bertako jakintsuengandik.
Eraman Itaka beti gogoan,
haraino ailegatzea zure patua
baita.
Baina ez presaka egin zure bidaia!
Hobe da urte askotan luzatzea,
eta uhartean zaharturik porturatzea,
bidean irabazitakoarekin
aberasturik,
Itakak berak aberats zaitzala itxaron
barik.
Itakak eskaini zizun bidaia zoragarria,
bera gabe ez zenukeen bidaiarik
egingo,
baina jada ez du zuri emateko beste
ezer.
Zuk pobre aurkitzen baduzu ere,
Itakak ez zaitu engainatu.
Horrela, jakintsu bihurtu zaren
horrek,
esperientziaz beterik zauden horrek,
hobeto ulertuko duzu Itakak egiaz
zer diren.