Eskolako jolastokia oso
handia eta berezia genuen, zeren eta auzoaren gaineko Argalario menditik zetorren
erreka batek luzetara zeharkatzen baitzuen, eta uharkaren ondoan enbor
sendoetako astigarrak, ilaran landaturikoak, kokatzen baitziren. Harri eta
areazko lur gainean jolasten ginen, futbolean gehien bat, zuhaitzetako erroekin
behaztopatu edo errekara erortzeko arriskuaz (eta, izan ere, behin baino
gehiagotan horixe bera gertatu izan zitzaigun niri edo nire lagunaren bati),
baina horregatik arrangurarik eduki gabe. Aitzitik, lasterka egiten genuen
pilotaren atzetik uretara heltzen zeneraino, eta baloia hartzeko ortozik sartzera ausartzen zenak
gainontzekoen txaloak harrotasunez jasotzen zituen. A zelako partidak jokatzen genituenak, ni atezain, Iribar legez, eta besteak Uriarte,
Amancio edo Gentoren jokaldiak imitatzen, txoroak bezala lehiatzen, izerdi-patsetan
eta belaunak odoleztaturik bukatzen genuen arte. Kromo bildumetako futbolariak biziro
miresten genituen, eta euren ereduari jarraitzeko xedea deliberatua genuen zegoeneko
gutako mutil gehienok. Kinkinean ere maiz aritzen ginen, burdin zorroztuak lurrean
iltzatzeko indarrez jaurtitzen, gurasoen esanari uko eginez eta haien kezkarako,
beldur baitziren istripu larriren bat suerta zitekeelako. Eta puxtarriak, txapak,
uztaiak..., dozenaka joko genuen gure jolas-orduak betetzeko.
Neskek, bitartean,
koloretako kromo saltariak eta kurkuluxak zerabiltzaten arkupeko eskaileretan
eta patioko leihoen azpiko zintarrietan jesarrita, edo gomak eta sokak, eurek
ere salto egiteko kanta xinpleen erritmoarekin
batera: “Bat, bi eta hiru, lau, bost eta
sei ”. Soineko motzak eta galtzerdi luzeak jantzirik, mutiloi zeharka
begiratzen gintuzten, gehiago pilotaren kolpe bat hartzeko beldurrez, gure
jirabiretan interesatuta egoteagatik baino. Artean ume txikiegiak ginen
neskatan ibiltzeko, baina gure jokoetako balentriak handiagoak ziren neska
haietako edozeinek ikusten baldin bazituen. Haien adatsen dantza, usain leuna
eta ibilera lirainak zoragarriak iruditzen zitzaizkidan gelako bi zatien (neskak
eta mutilak) arteko pasabidean aurrera nire ondotik sumatzen nituenean. Haiek,
ordea, ez zuten niregan erakarrita sentitzeko seinalerik ttipiena ere egiten,
eta laster bueltatu behar izaten nintzen, lotsatuta, kaligrafiazko koadernoaren
gainean idaztera edota ikasmahaiaren tapakiaren atzean ezkutatzera.
("Nire haurtzarokoak" nire ipuinaren zatia)
No hay comentarios:
Publicar un comentario