Mezua:
|
|||||
Egunon, Joseba:
Arraroa egingo zaizu baina, ikusten
duzunez, orain arte inoiz egiten ez genuena egitera behartuta nago oraingo
honetan, zuri mezu bat bidaltzera, hain zuzen ere.
Bosgarren solairu honetara etorri
naizenetik ez zaitut ikusi eta, zoritxarrez,
hiru aste hauetan zurekin mintzatu edo elkarri agur esateko aukerarik suertatu
ez zaidanez, zuri idaztea erabaki dut, ausardi handiegiaz beharbada.
Seguraski ez duzu imajinatuko zein latza
egin zaidan zugandik urrundu behar hau. Gutxien espero nuenean, Zuzendari
Orokorra nigana etorri eta promozionatu egingo ninduela esan zidan
bat-batean. Gero, niri ezer erantzuteko astirik eman gabe, azkar jiratu eta
aho bete hortz utzi ninduen.
Badakit honezkero zer pentsatzen egongo
zaren. Azken finean, lanpostu hobeago baten zain egon naiz denbora dezentean,
zure Saileko Buru izan arren ez bainintzen nahikoa baloratua sentitzen. Enpresan
egindako nire lanari eta esperientzia luzeari esker, maila altuagoko arlo
batean hobeto egongo nintzela suposatzen nuen. Gainera, soldata igoera ere
etorriko zen, eta alde horretatik zer esango dizut, askoz ere hobeto oraindik.
Baina orain, nahiz eta laneko eginkizunei buruz kexarik ez dudan, badaukat
egunero zerbait txarto egin dudanaren sentsazio bitxia. Hutsune handia
bezalako zera bat sumatzen dut sabelean barrena, gorputzean gora hedatzen
dena, bihotz parera iristeraino. Eta hain da mingarria zeren eta, dagoeneko,
sinesten hasia bainaiz ez dudala zuregana hurbiltzeko pauso txiki bat
besterik eman behar, bihotza erretzen didan sukar hau behingoz amatatzen joan
dadin.
Bai, onartu beharrean nago. Ez dago
gezurretan ibili beharrik. Ez nire buruarekin, ezta zurekin ere, Joseba. Zu,
zu zeu izan zara, zalantzarik gabe, azken urte hauetan egunero lanera pozik
etortzeko nuen arrazoi nagusia. Nire bulegora kontsultaren bat egitera
sartzen zinenean tripak irauli egiten zitzaizkidan urduriaren urduriaz, eta
bularraren barnealdean taupadaka zebilkidan bihotza, kontrolik gabe. Paperak edo
karpetak ematerakoan zure esku epelak ustekabean nireekin topatzen baldin
baziren, karranparekin batera dardara izugarriak sentitzen nituen supituki.
Eta han goitik zure begi urdin argiek begiratzen zidatenean, nire betazalak
astiro makurtzen ziren, errendituta. Zure begiradaren aurrean, saileko
nagusia nintzen arren, menderatuta nengoen ezinbestean. Zure ahots goxoaren soinuak
luzaz bibratzen zidan belarri barruetan eta, erantzuteko orduan, nire
ahotsak, adorea galduta, sentitzen ari nintzenaren berri ematen zizula
iruditzen zitzaidan. Akaso zu ez zinen konturatuko, baina niretzat argi
zegoen zurekin ez nuela inolaz ere agertzen saileko lankide guztiekin
erakutsi behar nuen autoritatezko jarrera irmoa.
Hamazortzi egun hauek aski izan
dira niretzat zureganako sentimenduak argitu eta gu bion egoeraren absurduaz
jabetzeko. Maite zaitudala, Joseba, eroki maite zaitudala esan behar dizut
lehenik eta behin, eta zu gabe ezingo dudala bizi. Baina horretaz ziur nagoen
bezala, badakit ere enpresaren alde egin behar dudala derrigorrean, nire
lanpostu berriko erantzukizunei muzinik egin gabe. Gainera, Zuzendari
Orokorrak nigan jarri duen konfiantzari ezin diot inolaz ere huts egin, nahiz
eta askotan bere jokaerekin zaila ipintzen didan. Are gehiago nire emaztea
eta nire seme-alaben ama denean, ez duzu uste?
Beharbada ezjakintasunean jarraitzea
nahiago zenuke, eta nik ere duda egiten dut esan dizudana gure onerako edo
txarrerako izango den, baina benetan oso nekeza gertatzen zitzaidan barnean
ditudan grinak neuretzat gordeta uztea, eta zureganako nire amodio ezinezkoa
aitortu gabe bizitza arruntarekin aurrera segitzea.
Beraz, itxaropenez, zure erantzunaren
zain geratzen naiz.
Koldo
|
domingo, 6 de octubre de 2013
Mezua
Suscribirse a:
Enviar comentarios (Atom)
No hay comentarios:
Publicar un comentario